ЗАМЕЖНЫ АГЛЯД

ІРАН УЗБАГАЧАЕ ЎРАН

Ужо з заўтрашняга дня Іран распачынае вытворчасць узбагачанага да ўзроўню 20 адсоткаў урану. Пра гэта заявіў кіраўнік Арганізацыі атамнай энергіі Ірану.

Распрацаваць ядравае паліва больш высокага класу загадаў навукоўцам у нядзелю прэзідэнт Махмуд Ахмадынэжад. Міністр абароны ЗША Робэрт Гейтс назваў "недарэчнай" заяву Тэгерану, буйнога імпарцёра нафты, пра ўзбагачэнне ўрану выключна ў мэтах атрымання электраэнергіі. У выпадку, калі Іран усё ж распачне праграму, ЗША і Нямеччына пагражаюць ўзмацніць санкцыі супраць гэтай краіны.

«ЭНДЭВАР» АДПРАВІЎСЯ НА МКС

Сёння а 11:14 менскага часу з касмічнага цэнтру імя Кенэдзі ў Фларыдзе стартаваў шатл “Эндэвар”. У сераду ён мусіць састыкавацца з Міжнароднаю касмічнаю станцыяй і даставіць на яе неабходныя кампаненты ды абсталяванне. Першую спробу запусціць шатл у нядзелю раніцаю НАСА адклала з-за шчыльнай хмарнасці.

КІТАЙСКАЯ ЭКАНОМІКА Ў ПЛЮСЕ

Кітай рыхтуецца сустрэць год Тыгра ў якасці адзінай краіны, эканоміка якой падчас сусветнага эканамічнага крызісу вырасла ўдвая.

"Гэты год лепшы за мінулы. Летась было цяжка знайсці працу, але зараз ужо нашмат лягчэй".

Эксперты прагназуюць, што ў 2010 годзе дзякуючы інвестыцыям і ўнутранаму спажыванню рост ВУП Паднябеснай павялічыцца прыкладна на 10 адсоткаў. Калі прагноз спраўдзіцца, ужо да канца года кітайская эканоміка будзе другой у свеце пасля ЗША.

Сяргей Марчык «Аб'ектыў»