ЗНІШЧАЛЬНАЯ СУМЕСЬ

Гэтаю зімою сталі папулярнымі адмысловыя сезонныя сметнішчы. Але туды звозіцца не смецце, а снег, які, аднак, паляжаўшы ў брудным горадзе, у пэўным сэнсе таксама становіцца смеццем.

Снег, змяшаны з соллю і пяском, пераўтвараецца ў сапраўдны знішчальнік. Ботаў ды аўтамабільных апонаў.

ЖЫХАР МАГІЛЁВА:

"У зімовы час лепш, каб машына стаяла ў гаражы, увогуле не чапаць яе. Абутак тым больш. Увесь рассыпаецца. Не хапае на сезон зімовага абутку". 

Аднак найбольшую шкоду такая танная снежна-саляная сумесь прыносіць навакольнаму асяроддзю і чалавеку, трапляючы ў глебу ды ваду. Такую вось карціну назіраюць у Магілёве.

ВІКТАР СЕЛІХАНАЎ, УП "ЭКАЛОГІЯ ГОРАДУ І ВЁСКІ":

"Свінец, калій, цэзій. Практычна ўся сумесь табліцы Мендзялеева і іх злучэнні. Усё гэта ідзе сюды. Потым у Пячэрску людзі п'юць".

Камунальнікі часта не паспяваюць альбо папросту лянуюцца звозіць снег на адмысловыя палігоны ды згружаюць яго на пляцоўкі ў цэнтры гораду, адкуль брудная маса спаўзае пад адхон гарадскога валу. Калі снег пачне таяць, уся гэтая хімічная сумесь апынецца ў Дняпры.

ВІКТАР СЕЛІХАНАЎ, УП "ЭКАЛОГІЯ ГОРАДУ І ВЁСКІ":

"І самае галоўнае, нават калі танна, трэба ніжэй Дняпра звозіць".

За мінулы тыдзень толькі з Менску вывезлі больш за 140 тысячаў кубаметраў снегу. У рэгіёнах сітуацыя больш напружаная.

КІРОЎЦА СНЕГАЎБОРАЧНАЙ МАШЫНЫ:

"Не паспяваем. Тэхнікі-то мала. Вось на мосце стаяць. Пагрузчыкі працуюць, а тэхнікі няма".

Аднак не стае і працоўнай сілы. На ўвесь трохсотсямідзесяцітысячны Магілёў толькі 34 працаўнікі "Зелянгасу" прыбіраюць снег. Большасць гараджанаў ставіцца да сітуацыі з разуменнем.

ЖЫХАРЫ МАГІЛЁВА:

"А што, глядзіце, як яны працуюць! Што, нядрэнна? Я лічу, што выдатна".

"Сёлета столькі снегу, што я не ведаю, якія могуць быць да іх прэтэнзіі!"

Пакуль прэтэнзіі наконт санітарных нормаў магілёўскім уладам выказваюць толькі эколагі, а звычайныя жыхары маўчаць, снег працягваюць згружаць у не прызначаныя для гэтага месцы.

Аўгіня Манцэвіч, "Аб’ектыў"