Афіцыйная пазіцыя тэлеканалу "Белсат" у сувязі з падзеямі 3 лютага ў Менску.
3 лютага, каля 15-й гадзіны тры працаўнікі міліцыі здзейснілі спробу ўварвацца ў кватэру, якую здымае прадстаўнік тэлеканалу “Белсат” у Менску. Адначасова ў кватэры адключылі электрычнасць. У той час у кватэры былі беларускія журналісты. Міліцыянты затрымалі незалежнага журналіста Івана Шульгу (на здымку). Намеснік начальніка РУУС Савецкага раёну сталіцы ў размове з прадстаўніком “Белсату” паведаміў, што І. Шульгу вінавацяць у тым, што ён нібыта ўдарыў міліцыянта. Месцазнаходжанне журналіста “Белсату” невядомае. Ні ў адным з РУУСаў Менску факту затрымання не пацвердзілі.
Каментуе Агнешка Рамашэўская-Гузы, дырэктар тэлеканалу “Белсат”:
“Мы лічым што сённяшнія дзеянні беларускіх уладаў у дачыненні тэлеканалу “Белсат” – гэта чарговая спроба перашкодзіць працы і дыскрэдытаваць незалежных журналістаў. Сочым за лёсам нашага калегі – журналіста Івана Шульгі, затрыманага сёння міліцыяй, – і прыкладзем усе намаганні для яго вызвалення.
Варта адзначыць таксама, што апошнімі тыднямі ўзмацніўся ціск з боку спецслужбаў на журналістаў тэлеканалу.
Запэўніваем нашых гледачоў, што ціск з боку ўладаў не паўплывае на нашую журналісцкую пазіцыю. Мы і надалей будзем несці праўдзівую інфармацыю жыхарам Беларусі.
Выказваем падзяку калегам з іншых сродкаў масавай інфармацыі за прафесійную салідарнасць”.
|
